Madaxweyne Xasan Sheekh: Soomaaliya waxay adeegsan doontaa “xoog iyo xeelad” si ay uga hortagto Israa'iil

Madaxweynaha ayaa sidoo kale sheegay in sharciga doorashooyinka uu hadda yahay sharci dhaqan galay, islamarkaana uusan ahayn hindise sharciyeed meel yaalla, balse bulshada Soomaaliyeed ay ku dhaqmayaan, sida uu hadalka u dhigay.

Arrinta Israa'iil ayaa ahayd qodobka ugu mudada dheeraa ee uu khudbaddiisa kaga hadlay. Madaxweyne Xasan Sheekh wuxuu sheegay in dowladda Soomaaliya ay adeegsan doonto "xoog, xeelad iyo diblumaasiyad" iyo dhammaan agabka ay awooddo si looga hortago, sida uu sheegay, in Israa'iil ay saldhig ama joogitaan ka sameysato Soomaaliya. "Waxaan ka shaqeynaynaa xoog, xeelad iyo diblumaasiyad. Wax kasta oo aan haysanno waxaan u adeegsan doonnaa sidii Israa'iil aysan halkaas uga degi lahayn" ayuu yiri madaxweynaha

Dhanka kale, madaxweynuhu wuxuu ku eedeeyay qaar ka mid ah siyaasiyiinta mucaaradka inay u adeegayaan danaha dalal shisheeye, isaga oo sheegay inay mudnaanta siinayaan hirgelinta dano aan ahayn kuwa Soomaaliya. Madaxweynaha ma uusan magacaabin shaqsiyaadka uu eeddaas u jeediyay.

si kastaba furitaanka kalfadhigaan ayaa imaanaya iyadoo uu 4-tiii bishii maarso soo gaba gaboobay kalfadhigii 7-aad ee Baarlamaanka, kaas oo lagu ansixiyay inta uu socday 13 hindise sharciyeed, waxayna yeesheen 58 fadhi, taas oo ka dhigaysa kalfadhigii ugu kulamada badnaa tan iyo markii ey bilowdeen kulamada Baarlamaanka 11-aad.

Kalfadhigii 7-aad ayaa sidoo kale lagu xusuusan doonaa ansixinta wax ka beddelka qaar ka mid ah cutubyada dastuurka ku meel gaarka ah, taas oo noqotay arrin dhalisay dood siyaasadeed oo ay si kala duwan uga falceliyeen dowladda iyo mucaaradka.