Jigjiga (Dawan) – Dowlad Deegaanka Soomaalida (DDS) ayaa si rasmi ah u dhagax-dhigtay kulliyad caafimaad oo laga hirgelinayo magaalada Dhagaxbuur, taas oo ku kacaysa 507 milyan oo birr (u dhiganta $3,274,023). Mashruucan ayaa lagu tilmaamay mid wax weyn ka tari doona yaraanta xirfadlayaasha caafimaadka ee deegaanka.
Munaasabadda dhagax-dhigga waxaa ka qeyb galay Wasiirka Xafiiska Madaxweynaha DDS, Xuseen Xaashi Qaasim, Wasiirka Xirfadaha iyo Shaqo Abuurka, Xuseen Gaydh, masuuliyiin kale oo ka tirsan xukuumadda, iyo Madaxa Bangiga Adduunka ee dalalka Itoobiya, Eritrea, Koonfurta Suudaan iyo Suudaan, Marwo Maryan Salim.
Dr. Xuseen Xaashi Qaasim ayaa sheegay in kulliyaddan cusub ay door muhiim ah ka qaadan doonto soo saarista cudud caafimaad oo ka jawaabta baahida sii kordheysa ee adeegyada caafimaad. Wuxuu xusay in deegaanka, oo baaxaddiisu la mid tahay dal weyn isla markaana ay dadku ku kala firirsan yihiin dhul ballaaran, ay adag tahay in si fudud loo gaarsiiyo adeegyada aasaasiga ah sida caafimaadka.
“Deegaankeennu waa mid aad u ballaaran, ballaciisuna la mid yahay waddan weyn sida Jarmalka, dadkiisuna waa kuwo ku kala firirsan dhul baaxad leh. Sidaas darteed, gaarsiinta adeegyada aasaasiga ah, gaar ahaan caafimaadka, waa arrin culus,” ayuu yiri Wasiirka.
