Washington (Dawan)– Xeer-ilaaliyayaasha Mareykanka ayaa shaaciyay in Cabdikariim Cabdullaahi Ciidle, oo ka mid ah dadka loo haysto masumaasuqii la xiriiray hay'adda "Quudinta Mustaqbalkeenna" (Feeding Our Future), lagu xiray magaalada Muqdisho 25-kii Juun, iyadoo howlgalka lagu qabtay ay gacan ka geysatay Hay'adda Sirdoonka iyo Nabadsugidda Qaranka (NISA).
Sida lagu sheegay war-saxaafadeed ka soo baxay Xafiiska Xeer-ilaaliyaha Mareykanka ee gobolka Minnesota, Cabdikariim oo 42 jir ah isla markaana deggen magaalada Burnsville ee gobolka Minnesota, ayaa lagu tilmaamay inuu ka mid ahaa dadkii hormuudka ka ahaa abaabulka nidaamka masumaasuq ee lagu lunsaday lacagihii loogu talagalay barnaamijyada nafaqeynta carruurta.
Cabdikariim ayaa bishii Sebtembar 2022 lagu soo oogay dacwado ay ka mid yihiin shirqool khiyaano dhanka isgaarsiinta ah, laaluush la xiriira barnaamijyada dowladda federaalka, dhaqidda lacagaha iyo dambiyo kale.
Dukumentiyada maxkamadda ayaa muujinaya in Cabdikariim uu ka tirsanaa hay'adda Feeding Our Future, halkaas oo uu mas'uul ka ahaa qorista iyo taageeridda xarumaha ka qeybgalayay Barnaamijka Nafaqeynta Carruurta ee Dowladda Federaalka Mareykanka.
Xeer-ilaaliyayaashu waxay ku eedeeyeen isaga iyo shaqaale kale inay dalbadeen isla markaana qaateen laaluush iyo lacagaha dib-u-bixinta oo ay ka heleen shaqsiyaad iyo shirkado doonayay in loo ansixiyo xarumo been abuur ah oo cunto qeybiya. Lacagahaas ayaa, sida dacwaddu sheegtay, loo marin jiray shirkado magac-u-yaal ah iyadoo loo ekaysiinayay khidmadaha la-tashiga.
