Al-Calamayn (Dawan)– Madaxda Masar, Soomaaliya, Eritrea iyo Suudaan ayaa maanta shir afar-geesood ah ku yeeshay magaalada Al-Calamayn ee dalka Masar, waxayna soo saareen bayaan wadajir ah oo taabanaya arrimaha ugu xasaasisan Geeska Afrika, kuwaas oo ay ka mid yihiin Badda Cas, Webiga Niil, midnimada Soomaaliya iyo xaaladda Suudaan, xilli Itoobiya uu ka socdo dagaal qaraar oo ay ku eedeysay in Masar, Eritrea iyo Suudan ay qeyb ka yihiin.
Shirka waxaa martigeliyey Madaxweynaha Masar Cabdifataax Al-Siisi, waxaana ka qayb galay Madaxweyne Xasan Sheekh Maxamuud, Madaxweynaha Eritrea Isayas Afwerki iyo Guddoomiyaha Golaha Madaxtooyada Ku-meelgaarka ah ee Suudaan Jeneraal Cabdifataax Al-Burhaan.
Bayaanka ayaa si cad u taageeray midnimada iyo madax-bannaanida Soomaaliya, wuxuuna diiday faragelin ama tallaabo kasta oo lagu beegsanayo wadajirka dhuleed ee dalka. Afarta dal waxay sidoo kale diideen aqoonsi ama taageero kasta oo la siiyo Somaliland, iyagoo ku tilmaamay xadgudub ka dhan ah madax-bannaanida Soomaaliya.
Madaxdu waxay taageereen dadaallada dowladda Soomaaliya ee la dagaallanka argagixisada, waxayna ugu baaqeen saaxiibada gobolka iyo kuwa caalamka inay bixiyaan maalgelin ku filan oo joogto ah oo loo sameeyo howlgalka AUSSOM ee Midowga Afrika, si amniga si habsami ah loogu wareejiyo ciidamada Soomaaliyeed.
Bayaanka ayaa xaqiijiyey mabda'a xorriyadda socdaalka badda, wuxuuna sheegay in maamulka Badda Cas uu yahay mas'uuliyad gaar u ah dalalka xeebaha leh oo keliya, taas oo miiska soo saareysa dooda Itoobiya ahayd in ay Badda gaarto mar uun.
Dhinaca Webiga Niil, madaxdu waxay ku adkeysteen ixtiraamka sharciga caalamiga ah ee wabiyada xuduudaha ka gudba, gaar ahaan mabda'a waxyeello la'aanta, iyo in iskaashiga uu ku dhisnaado ogeysiis hore, wadatashi iyo is-afgarad. Waxay si buuxda u diideen tallaabo kasta oo hal dhinac ah oo waxyeello u geysata isticmaalka biyaha ee Masar iyo Suudaan. Wabigga Niil intiisa badan ayaa ka soo bilowda dalka Itoobiya oo biya xireen ay Masar diidan tahay ka dhistay wabiga.
