Maxaa looga hadlay kulanka Madaxweyne Xasan Sheekh iyo Safiirka Midowga Yurub?

Muqdisho (Dawan ) – Madaxweynaha Soomaaliya Xasan Sheekh Maxamuud ayaa maanta oo Axad ah la kulmay Safiirka Midowga Yurub ee Soomaaliya Francesca Di Mauro, iyagoo ka wadahadlay iskaashiga laba geesoodka ah, dhismaha dowladnimada iyo arrimaha horumarinta, sida ay sheegtay Villa Somalia.

Sida lagu sheegay war kasoo baxay Madaxtooyada Soomaaliya, kulanka ayaa diiradda lagu saaray xiriirka soo jireenka ah ee Soomaaliya iyo Midowga Yurub iyo sidii loo xoojin lahaa iskaashiga dhinacyada ay wadaagaan.

Labada dhinac ayaa sidoo kale ka hadlay taageerada la xiriirta dadaallada Soomaaliya ee dhismaha dowladnimada iyo qorshayaasha horumarinta dalka, sida lagu sheegay qoraalka.

Villa Somalia ayaa sheegtay in labada dhinac ay carrabka ku adkeeyeen muhiimadda ay leedahay sii wadista wada-shaqeynta iyo wadatashiga ku saabsan arrimaha ay wadaagaan.

Midowga Yurub ayaan weli si rasmi ah war uga soo saarin kulanka.

Kulankan ayaa kusoo aadaya iyadoo aan wax natiijo ah kasoo bixin wadatashiyadii siyaasadeed ee Muqdisho ka dhacay intii u dhexeysay 13-ka ilaa 15-ka May, kuwaas oo u dhexeeyay dowladda federaalka Soomaaliya iyo siyaasiyiinta mucaaradka.

Midowga Yurub ayaa kamid ah saaxiibada ugu muhiimsan ee Soomaaliya, isagoo taageero ka siiya dhinacyada maamulka, amniga, gargaarka bani’aadannimo iyo horumarinta hay’adaha dowladda.

Soomaaliya ayaa wajahaysa khilaaf siyaasadeed oo la xiriirta dastuurka, doorashooyinka iyo hannaanka kala-guurka siyaasadeed, iyadoo dhinacyada siyaasadda ay isku mari la’yihiin qaabka loo wajahayo nidaamka doorashooyinka iyo dastuurka.