Maxaan ka naqaannaa mas’uulka AS u qaabilsanaa maaliyadda ee la dilay?

Muqdisho (Dawan)- Cabdullaahi Maxamed Cabdi, oo caan ku ahaa Cabdullaahi Wadaad, ayaa ka mid ahaa shaqsiyaadka ugu saameynta badan nidaamka maaliyadeed ee kooxda Al-Shabaab. Wuxuu mas’uul ka ahaa ururinta dakhliga, nidaamka cashuuraha, iyo kormeerka ilaha dhaqaale ee ay kooxdu ku tiirsan tahay, ka hor inta aan lagu dilin duqeyn cirka ah oo Mareykanku ka fuliyay deegaanka Kuunyo Barrow ee gobolka Shabeellaha Hoose 17-kii Janaayo 2026.

Noloshiisi hore iyo ku biiristii kooxaha hubeysan

Cabdullaahi Wadaad waxa uu ku dhashay gobolka Shabeellaha Dhexe, isaga oo sagaashamaadkii iyo bilowgii 2000 ka shaqeyn jiray dugsiyo ku yaalla Muqdisho oo uu ka dhigi jiray culuumta diinta. Isbeddelkiisa xagjirnimada ayaa billowday sanadkii 2005, markaas oo uu ku biiray Midowgii Maxkamadaha Islaamiga, kana mid noqday shaqsiyaadkii faafin jiray fikrado diimeed oo u janjeera dhinaca ad-adag.

Ka dib jabkii Maxkamadaha Islaamiga dabayaaqadii 2006, Cabdullaahi Wadaad waxa uu ka mid noqday hoggaamiyayaashii u cararay Eritrea, ka hor inta uusan dib ugu soo laaban Koonfurta Soomaaliya, halkaas oo uu si rasmi ah ugu biiray Al-Shabaab, oo xilligaas isu beddeshay urur hubeysan oo leh hannaan maamul iyo dhaqaale si wanaagsan loo nidaamiyay.

Dallacaaddiisa sare ee gudaha kooxda

Gudaha Al-Shabaab, Cabdullaahi Wadaad waxa uu si degdeg ah ugu dallacay hoggaan sare, isagoo macallin ka noqday xeryaha tababarka, kaalin muhiim ahna ka qaatay faafinta fikradda ururka. Kalsoonida lagu qabay iyo daacadnimadiisa awgeed, waxaa loo dhiibay hoggaanka waaxda loo yaqaan “zakaawada”, oo ah nidaamka cashuuraha ay kooxdu ka ururiso deegaannada ay ka taliso, kana mid ah ilaha dhaqaale ee ugu muhiimsan Al-Shabaab.

Bilowgii 2025, ilo xog-ogaal ah ayaa sheegay in Cabdullaahi Wadaad loo dallacsiiyay xil sare oo ka tirsan xafiiska maaliyadda ee Al-Shabaab, oo ah mid ka mid ah waaxyaha ugu xasaasisan uguna qaab-dhismeedka kooxda. Xilkan ayaa inta badan loo xilsaarraa shaqsiyaad muddo dheer la tijaabiyay, isla markaana lagu kalsoon yahay.

Saamaynta ka dhalan karta geeridiisa

Dilka Cabdullaahi Wadaad ayaa loo arkaa dharbaaxo kulul oo ku dhacday maamulka maaliyadeed ee Al-Shabaab. Inkasta oo kooxdu ay hore u muujisay awood ay ku buuxiso boosaska banaanaada, haddana luminta mas’uul heerkan gaarsiisan ayaa la rumeysan yahay inay saameyn ku yeelan doonto isku-duwidda dakhliga, bixinta mushaaraadka dagaalyahannada, iyo adkeynta nidaamka gudaha.

Falanqeeyayaal amni ayaa qaba in beegsiga mas’uuliyiinta maaliyadeed uu si toos ah u taabanayo awoodda hawlgal ee Al-Shabaab, maadaama dhaqaaluhu yahay tiir ka mid ah kuwa ugu muhiimsan ee ay ku shaqeeyaan dhammaan howlaha ururka. Taasi waxay ka dhigan tahay in dilka Cabdullaahi Wadaad uusan ahayn kaliya dhacdo soo wajahday ururka, balse uu si qoto dheer u saameynayo awoodda maamul iyo nidaamka maaliyeeda ee kooxda.