Muqdisho (Dawan) – Soomaaliya iyo Turkiga ayaa ka wada hadlay xiriirka laba geesoodka ah, arrimaha gobolka iyo iskaashiga istiraatiijiga ah kadib markii maanta kulna dhexmaray Madaxweynaha Soomaaliya Xasan Sheekh Maxamuud iyo Safiirka Turkiga ee Soomaaliya Alper Aktaş.
Sida lagu sheegay war kasoo baxay Villa Somalia, safiirka Turkiga ayaa booqasho sharafeed ku tagay madaxtooyada Soomaaliya ee Muqdisho.
Kulanka ayaa diiradda lagu saaray iskaashiga istiraatiijiga ah ee labada dal iyo arrimo heer gobol iyo caalami ah oo ay labada dhinac daneynayaan, sida lagu sheegay bayaanka madaxtooyada.
Madaxweyne Xasan Sheekh ayaa uga mahadceliyay dowladda iyo shacabka Turkiga taageerada ay siiyaan Soomaaliya, gaar ahaan dhinacyada dib-u-dhiska dowladda, amniga iyo horumarinta.
