Muqdisho (Dawan) – Wasaaradda Gaashaandhigga Jamhuuriyadda Federaalka Soomaaliya ayaa ugu hambalyeysay Boqortooyada Sacuudi Carabiya, Jamhuuriyadda Turkiga iyo Jamhuuriyadda Islaamiga ah ee Pakistan munaasabadda saxiixa “Heshiiska Difaaca Wadajirka ah ee Maka”, kaas oo ay ku tilmaantay tallaabo taariikhi ah oo muhiim u ah xoojinta amniga wadajirka ah, horumarinta iskaashiga difaaca iyo dhisidda iskaashi istaraatiiji ah oo looga hortagayo caqabadaha amni ee wadajirka ah.
Wasaaradda ayaa sheegtay in heshiiskani uu gacan ka geysan doono taageeridda dadaallada lagu xaqiijinayo amniga iyo xasilloonida gobolka iyo caalamka, iyadoo la xoojinayo mabaadi’da iskaashiga, isku duubnida iyo mas’uuliyadda wadajirka ah, si loogu adeego danaha shacabka gobolka loona taageero nabadda iyo amniga.
Boqortooyada Sacuudi Carabiya, Turkiga iyo Pakistan ayaa maanta oo Jimco ah magaalada Maka ku kala saxiixday “Heshiiska Difaaca Wadajirka ah ee Maka”, kaas oo looga gol leeyahay xoojinta iskaashiga difaaca iyo sare u qaadidda awoodda ka hortagga wadajirka ah ee khatar kasta ama weerar suurtagal ah, sida lagu sheegay bayaan wadajir ah oo ay soo saareen saddexda dal.
