Muqdisho (Dawan)– Golaha Wasiirrada Xukuumadda Federaalka Soomaaliya ayaa maanta ansixiyay hindise-sharciyeedka asalka badeecadaha, kaas oo dowladda ku tilmaantay tallaabo muhiim u ah horumarinta ganacsiga dalka iyo waafajinta shuruucda Soomaaliya ee la xiriira nidaamyada ganacsiga ee heer gobol iyo qaarad.
Hindise-sharciyeedkan, oo ay soo gudbisay Wasaaradda Ganacsiga iyo Warshadaha, ayaa lagu ansixiyay kulankii toddobaadlaha ahaa ee Golaha Wasiirrada ee uu guddoominayay Ra’iisul Wasaare Xamsa Cabdi Barre. Sida lagu sheegay war-saxaafadeed ka soo baxay Xafiiska Ra’iisul Wasaaraha, sharcigan ayaa dejinaya hannaan sharciyeed lagu go’aaminayo laguna caddeynayo halka ay badeecaddu asal ahaan ka soo jeeddo, taas oo Soomaaliya ka caawinaysa inay sii waafajiso shuruucdeeda ganacsiga nidaamyada gobolka iyo qaaradda.
Wasaaradda Ganacsiga iyo Warshadaha ayaa sheegtay in sharcigu dejinayo halbeegyada lagu go’aaminayo asalka badeecadaha beeraha, xoolaha, kalluumeysiga, macdanta iyo wax-soo-saarka warshadaha gudaha Soomaaliya, si loo helo nidaam mideysan oo lagu xaqiijiyo halka ay badeecaduhu ka soo farcameen.
Muhiimadda ugu weyn ee hindise-sharciyeedkan ayaa ah inuu saldhig sharci u noqonayo bixinta Shahaadada Asalka Badeecadda (Certificate of Origin), taas oo caddeyneysa halka badeecaddu asal ahaan ka soo jeeddo. Shahaadadani waxay door muhiim ah ka ciyaartaa go’aaminta u-qalmitaanka badeecadaha heshiisyada ganacsi ee bixiya cashuur-dhimista ama mudnaanta ganacsi.