Muqdisho (Dawan)– Madaxda ururrada shaqaalaha Soomaaliyeed ayaa Dowladda Federaalka Soomaaliya ka dalbaday in lala xisaabtamo Wasiirka Shaqada iyo Arrimaha Bulshada, Saalim Caliyow Ibroow, iyagoo ku eedeeyay faragelin iyo cadaadis uu ku hayo Xiriirka Guud ee Ururrada Shaqaalaha Soomaaliyeed.
Madaxda ururrada oo shir jaraa’id ku qabtay magaalada Muqdisho ayaa sheegay in cabashada ay ka qabaan wasiirka ay si wadajir ah u taageerayaan 13 urur oo ka kala socda qaybaha waxbarashada, caafimaadka, gaadiidka, farshaxanka, hoteellada, isgaarsiinta, dowladaha hoose, korontada, biyaha iyo cuntada.
Guddoomiyaha Ururka Iskaashatooyinka Soomaaliyeed, Maxamed Cusmaan Xaaji, ayaa sheegay in Wasiir Saalim Caliyow Ibroow uu isku dayayo in la wiiqo ama meesha laga saaro Xiriirka Guud ee Ururrada Shaqaalaha Soomaaliyeed, kaas oo uu sheegay inuu muddo dheer matalayay shaqaalaha Soomaaliyeed.
Wuxuu wasiirka ku eedeeyay inuu ururrada shaqaalaha ka reebay shir sannadle ah oo saddex-geesood ah oo lagu qabto magaalada Geneva ee dalka Switzerland, kaas oo ay isugu yimaadaan wakiillada dowladaha, loo-shaqeeyayaasha iyo shaqaalaha.
“Wasiirka Shaqada iyo Arrimaha Bulshada wuxuu go’aansaday in ururka shaqaalaha laga reebo shirkaas, isla markaana uusan sannadkan ka qaybgelin,” ayuu yiri Maxamed Cusmaan Xaaji.
Sidoo kale, Guddoomiyaha Ururka Iskaashatooyinka Soomaaliyeed ayaa sheegay in wasiirku waraaqo u diray hay’adaha shaqaalaha ee caalamiga ah iyo kuwa Afrika, kuwaas oo uu ku sheegay in Xiriirka Guud ee Ururrada Shaqaalaha Soomaaliyeed uusan ahayn urur sharci ah ama uusan matalaad ku lahayn dalka.
