Maxay xanbaarsantahay booqashada Abiy Axmed ee Jabuuti?

Jabuuti, 11 Janaayo 2026 (Dawan) – Ra’iisul Wasaaraha Itoobiya, Abiy Axmed, ayaa maanta oo Axad ah gaaray dalka Jabuuti, halkaas oo uu ku joogi doono booqasho shaqo oo qaadan doonta 24 saac, taas oo ujeeddadeedu tahay xoojinta xiriirka laba geesoodka ah ee dhinacyada ganacsiga, saadka iyo amniga, xilli Geeska Afrika ay ka taagan yihiin isbahaysiyo isbeddelaya iyo xiisado juquraafi-siyaasadeed.

Abiy Axmed waxaa garoonka diyaaradaha ee Jabuuti ku soo dhaweeyay Madaxweynaha Jabuuti, Ismaaciil Cumar Geelle. Ra’iisul Wasaaraha Itoobiya waxaa booqashada ku wehelinaya wafdi sare oo ay ka mid yihiin Wasiirka Arrimaha Dibadda Birhanu Tsegaye, Wasiirka Maaliyadda Axmed Shide, iyo Agaasimaha Guud ee Hay’adda Amniga Qaranka Redwan Xuseen.

Labada hoggaamiye ayaa kulan horudhac ah ku yeeshay garoonka, iyagoo dib u eegis ku sameeyay heerka iskaashiga labada dal, kuwaas oo Jabuuti ku tilmaantay “laba waddan oo dhaqaale ahaan is-kaabaya.” Kulankaas ayaa diiradda lagu saaray sidii loo sii xoojin lahaa iskaashi istiraatiiji ah oo waara, gaar ahaan dhinacyada horumarinta dhaqaalaha, saadka iyo isku-xirka gobolka.

Qoraal uu ku baahiyay bartiisa X, Ra’iisul Wasaare Abiy Axmed ayaa ku sheegay in wadahadallada uu la yeeshay Madaxweyne Geelle ay xoogga saarayeen isbeddellada juquraafi-siyaasadeed ee gobolka, nabadda iyo amniga, iyo xoojinta xiriirka laba geesoodka ah, gaar ahaan dhinacyada ganacsiga, saadka iyo horumarka. Waxa uu intaas ku daray in labada dhinac ay mar kale xaqiijiyeen sida ay uga go’an tahay xasilloonida, is-dhexgalka dhaqaale iyo barwaaqada wadajirka ah.

Itoobiya, oo ah waddan aan bad lahayn ayna ku noolyihiin in ka badan 120 milyan oo qof, isla markaana lagu tiriyo dalalka ugu dadka badan Afrika, ayaa in ka badan 95 % ganacsigeeda badda ku tiirsanyahay dekedaha Jabuuti. Booqashadan ayaa imanaysa xilli Addis Ababa ay sii waddo dadaallo ay ku raadinayso marinno badeed oo kala duwan, arrin dhawaan saameyn ku yeelatay xiriirkeeda qaar ka mid ah dalalka dariska ah.

Wadahadallada Jabuuti ayaa sidoo kale ku soo beegmaya xilli uu gobolka wajahayo dhaqdhaqaaq diblomaasiyadeed oo sii kordhaya, oo ay ka mid yihiin aqoonsigii Israa’iil ay u fidisay Somaliland iyo heshiisyo tamareed oo dhawaan dhexmaray Jabuuti iyo Masar, xilli Itoobiya uu weli muran kala dhaxeyo Qaahira kaas oo ku saabsan Biyo-xireenka Weyn ee Niilka Buluugga ah.