Muqdisho (Dawan)– Guddoomiyaha cusub ee Golaha Shacabka Soomaaliya, Cabdulqaadir Maxamed Nuur (Jaamac), ayaa sheegay in dalku uu wajahayo caqabado dhinacyada amniga, dhaqaalaha iyo siyaasadda ah, isagoo ku baaqay in la xoojiyo midnimada iyo iskaashiga si looga gudbo caqabadaha jira.
Nuur ayaa hadalkan ka sheegay xaflad casho ah oo Khamiistii loo qabtay soo dhaweyntiisa kaddib markii loo doortay Guddoomiyaha cusub ee Golaha Shacabka Soomaaliya.
Wuxuu sheegay in Soomaaliya ay wajahayso caqabado ay ka mid yihiin ku-tiirsanaanta taageerada dibadda, xaaladda dhaqaale ee adag, khatarta kooxaha hubeysan, kala-qaybsanaanta siyaasadeed iyo habab siyaasadeed oo hore, kuwaas oo uu sheegay inay qayb ka qaateen xaaladda maanta dalka ka jirta.
Guddoomiyaha ayaa ka digay in xaaladahaas ay Soomaaliya u horseedi karaan khataro waaweyn, oo ay ku jirto waxa uu ku tilmaamay faragelin shisheeye oo xooggan oo looga gol leeyahay in dhibaatooyinka Soomaaliya la sii dheereeyo.
Wuxuu sidoo kale qiray in dadaallada dowladda ee ku aaddan isbeddelka siyaasadeed iyo dib-u-habeynta ay la kulmi karaan khilaaf iyo aragtiyo kala duwan oo ka yimaada dhinacyada siyaasadda.
Si kastaba, Nuur wuxuu sheegay inay tahay in lasii wado dadaallada isbeddelka, iyadoo aan laga laaban caqabadaha laga yaabo inay ka hor yimaadaan.
Wuxuu ku baaqay midnimo, kalsooni, tanaasul iyo iskaashi si looga gudbo caqabadaha horyaalla Soomaaliya.
