Maxay yihiin diyaaradaha F-16 ee ka qeyb galay xuska 66-guurada Ciidanka xoogga Soomaaliya?

Soomaaliya (Dawan)- Mar qura waxaa shalay indhaha shacabka Muqdisho ay qabteen muuqaal aan caadi ahayn—diyaarado dagaal oo hawada sare ku sameynaya duulimaadyo bandhig ah, xilli la xusayay sanad-guuradii 66-aad ee Ciidanka Xoogga Dalka Soomaaliyeed.

Waxaan warbixintan idin kula wadaageynaa weydiimaha ku harereeysan diyaaradahan sida; Yaa iska leh? Waa imisa qiimahooda? Maxay yihiin diyaaradaha dagaalka? Maxaase ka dhigaya kuwo muhiim u ah amniga dalalka?

Diyaaradaha dagaalka ee loo yaqaan F-16 waxaa iska leh dowladda Turkiga, oo Soomaaliya kula jirta heshiisyo badan oo dhanka amniga ah. Waa diyaarado militari oo si gaar ah loogu talagalay inay la dagaallamaan diyaaradaha kale, isla markaana ay ilaaliyaan hawada dalka, sidoo kalena fulin karaan duqeymo cirka iyo dhulka ah, sida deegaano badan oo Soomaaliya ah laga fuliyo.

Waxay leeyihiin saddex astaamood oo waaweyn: xawaare sare, dabacsanaan ay si degdeg ah ugu leexan karaan, iyo qaadista hub casri ah sida gantaallo iyo qoryo culayskoodu gaari karo ilaa 7,000 kg.

Diyaaradahan waxay qabtaan howlo kala duwan—laga bilaabo dagaalka hawada ilaa weerarrada dhulka, taas oo ka dhigaysa kuwo loo yaqaan “multi-role fighters” oo ah diyaarado awood u leh inay howlo badan.

Qiimaha hal diyaaradood oo F-16 ah ayaa u dhexeeya $50 milyan ilaa $80 milyan, halka noocyada casriga ah ay gaari karaan in ka badan $100 milyan marka lagu daro qalabka iyo taageerada.

Ka qeybgalka diyaaradaha dagaalka ee Turkiga ee munaasabadda Muqdisho ayaa muujinaya iskaashi militari oo sii xoogeysanaya oo u dhexeeya Soomaaliya iyo Turkiga, gaar ahaan dhinacyada tababarka iyo amniga.

Bandhiggan cirka ka muuqday ayaa sidoo kale ahaa fariin muujinaysa dadaallada lagu xoojinayo awoodda difaaca Soomaaliya iyo dib u dhiska Ciidanka Qalabka Sida.