Muqdisho (Dawan) — Maxkamadda Darajada Koowaad ee Ciidamada Qalabka Sida ayaa sabtidii dil toogasho ah ku xukuntay askari hore Cabdi Aadan Ibraahim, oo lagu naaneyso “Soddon”, kaddib markii lagu helay dilka Yuusuf Axmed Cabdi oo saarnaa mooto bajaaj.
Dhacdada ayaa 26-kii Luulyo 2026 ka dhacday xaafadda Iga-daba-geey ee degmada Garasbaaley, sida uu sheegay guddoomiyaha maxkamadda, Gaashaanle Sare Xasan Cali Nuur Shuute.
Sida lagu sheegay dacwadda, marxuumka oo ku shaqeysan jiray farsamada dhismaha guryaha ayaa galabnimadii shaqada ka soo baxay, wuxuuna kireystay mooto bajaaj si ay gurigiisa u geyso.
Eedeysanaha oo waddada taagnaa ayaa la sheegay inuu joojiyay bajaajta oo uu dalbaday in la sii qaado, balse darawalka ayaa u sheegay inaysan isku jiho u socon.
Maxkamaddu waxay sheegtay in Cabdi Aadan uu markaas hakiyay bajaajta, kuna andacooday inuu ka shakiyay rakaabka iyo darawalka, isla markaana ay tahay in la baaro.
