Jigjiga (Dawan ) – Maxkamadda Guud ee Dowlad Deegaanka Soomaalida ayaa heshiis iskaashi laba geesood ah la saxiixatay Maxkamadda Maamulka Suuqa Raasamaalka Itoobiya (ECMAT), iyadoo heshiiska lagu sheegay mid lagu xoojinayo iskaashiga garsoorka iyo aqoonta sharciyeed ee la xiriirta arrimaha dhaqaalaha iyo maalgashiga.
Heshiiska ayaa lagu saxiixay munaasabad ka dhacday xarunta Maxkamadda Guud ee Dowlad Deegaanka ee magaalada Jigjiga, sida ay sheegtay warbaahinta dowladda deegaanka Jimcihii.
Mas’uuliyiinta ayaa sheegay in heshiiska is-afgaradka uu ujeedkiisu yahay kor u qaadista awoodda farsamo iyo xirfadeed ee garsoorayaasha, khubarada sharciga iyo xirfadlayaasha ka shaqeeya hay’adaha caddaaladda ee DDS.
Maxkamadda Guud ee Dowlad Deegaanka ayaa sheegtay in heshiiskan uu qeyb ka yahay dadaallada lagu xoojinayo nidaamka caddaaladda iyo awoodda hay’adaha la xiriira koboca dhaqaalaha iyo maalgashiga deegaanka.
Guddoomiye ku-xigeenka Maxkamadda Guud ee Dowlad Deegaanka Soomaalida, Cabdikariin Axmed Maxamuud ayaa sheegay in heshiiska uu gacan ka geysan doono xoojinta aqoonta sharciyeed ee la xiriirta arrimaha maaliyadda iyo maalgashiga, isla markaana uu taageeri doono dadaallada lagu horumarinayo jawiga maalgashiga deegaanka.
