Addis Ababa (Dawan) – Guddoomiyaha Guddiga Midowga Afrika, Maxamuud Cali Yuusuf, ayaa ku baaqay in si degdeg ah loo dejiyo xiisadda militari ee ka soo cusboonaatay waqooyiga Itoobiya, isla markaana dowladda federaalka iyo Jabhadda Xoreynta Shacabka Tigray (TPLF) ay dib u bilaabaan wadahadal toos ah.
Bayaan uu soo saaray ayuu Maxamuud Cali Yuusuf ku sheegay inuu si weyn uga walaacsan yahay qabsashada garoomada diyaaradaha ee Mekelle, Axum iyo Shire ee uu ku eedeeyay ciidamada Tigray, xarigga shaqaale ka tirsan dowladda federaalka iyo hakadka ku yimid duulimaadyada rayidka. Waxa kale oo uu walaac ka muujiyay wararka ku saabsan dagaallo ka socda qaybo ka mid ah koonfurta Tigray iyo gobolka Cafarta
Guddoomiyaha ayaa sheegay in qabsashada garoomada rayidka ahi ay ka hor imanayso waajibaadka ku xusan Heshiiskii Pretoria, oo dowladda Itoobiya iyo TPLF ay saxiixeen 2-dii Nofeembar 2022. Wuxuu ka digay in xiisadda cusub iyo isbahaysiyada siyaasadeed iyo militari ee dhowaan la sameeyay ay dhaawici karaan horumarkii laga gaaray nabadda.
