Mucaaradka: Ma aqbali doono wax muddo kororsi ah

Kismaayo (Dawan)- Warmurtiyeedka kasoo baxay shirka Mucaaradka ee lagu soo gabagabeeyay magaalada Kismaayo ayaa xoogga lagu saaray arrimaha doorashiyinka, iyada oo lagu sheegay inaan la aqbali doonin wax muddo kororsi ah marka la gaaro dhamaadka mudda xileedka hay'adaha dowladda. Mucaaradku waxa uu ka digay khataraha ka dhallan kara muddo-kordhin iyo hannaan doorasho oo aan heshiis lagu ahayn.

Qodobada kasoo baxay shirweynaha ayaa hoosta ka xarriiqay in muddo-xileedka Baarlamaanka Federaalka uu ku egyahay 14-ka Abriil 2026, halka kan Madaxweynaha uu ku egyahay 15-ka May 2026, iyadoo si cad loo sheegay in aan la aqbali doonin wax muddo-kordhin ah oo ka baxsan sharciga, laguna tilmaamay mid horseedi karta firaaq dastuuri ah iyo qalalaase amni.

Siyaasiyiintu waxay muujiyeen inay diyaar u yihiin in lala fariisto Madaxweynaha dalka, si looga wada xaajoodo qabsoomidda doorasho heshiis lagu yahay, daahfuran, kana horumarsan tii 2022, islamarkaana xoojinaysa matalaadda deegaannada iyo sharciyadda hay’adaha ka dhasha.

Sidoo kale, waxaa Madaxweynaha loogu baaqay inuu muddo bil gudaheed ah isugu yeero saamileyda siyaasadeed si loo helo hannaan doorasho oo waqtigeeda ku dhacda, isla markaana waafaqsan dastuurka iyo heshiis qaran. Shirweynuhu wuxuu carrabka ku adkeeyay in haddii baaqaas la iska indha tiro, ay qaadi doonaan tallaabooyin kale oo looga hortagayo firaaq dastuuri ah.

Siyaasiyiinta Mucaaradku waxay si adag u dhaliileen doorashada laga qabanayo Gobolka Banaadir, waxayna ku tilmaameen mid hal dhinac ah, aan heshiis lagu ahayn, kana hor imaanaysa dastuurka iyo shuruucda dalka, maadaama weli aan la isku raacsanayn maqaamka caasimadda.

Gunaanadkii, shirweynaha Kismaayo ayaa ku boorriyay Beesha Caalamka in ay sii xoojiso taageerada geeddi-socod doorasho oo loo dhan yahay, waqtigeedana ku dhadca, si Soomaaliya uga gudubto marxalad hubanti la’aan siyaasadeed una gaarto kala-guur dastuuri ah oo nabad ah.