Muddo intee ah ayay qaadaneysaa hirgelinta Dastuurka?

Muqdisho (Dawan) – Golaha Wasiirrada Xukuumadda Federaalka Soomaaliya ayaa sheegay in hirgelinta Dastuurka Jamhuuriyadda Federaalka Soomaaliya ay qaadan karto muddo saddex sano ah, kaddib kulan looga hadlay qorshaha lagu dhaqan-gelinayo qodobada dastuurka.

Kulanka oo uu guddoomiyay Ra’iisul Wasaare Xamsa Cabdi Barre, ayaa diiradda lagu saaray qorshaha hirgelinta dastuurka, muddada uu qaadanayo iyo farsamada lagu fulinayo qodobada muhiimka u ah hay’adaha dowladda, siyaasadda dalka iyo midnimada qaranka.

Wasaaradda Caddaaladda iyo Arrimaha Dastuurka ayaa Golaha Wasiirrada u soo bandhigtay qorshe lagu hirgelinayo dastuurka, iyadoo sheegtay in ujeeddadu tahay in la xaqiijiyo fulinta qodobada dastuurka muddada u dhexeysa 2026 illaa 2029.

Ra’iisul Wasaare Xamsa Cabdi Barre ayaa sheegay in dastuurku dhaqan-gal yahay laga bilaabo maalintii uu saxiixay Madaxweynaha Jamhuuriyadda Federaalka Soomaaliya iyo maalintii lagu soo saaray faafinta rasmiga ah, hase yeeshee hirgelintiisa farsamo ay qaadan doonto waqti.

Warbixinta Wasaaradda Caddaaladda iyo Arrimaha Dastuurka ayaa sidoo kale lagu sheegay in Golaha Wasiirrada la horgeyn doono qaraar qeexaya shaqooyinka mudnaanta leh ee dastuurka ku jira, kuwaas oo la qorsheeyay in lagu fuliyo 12-ka bilood ee soo socda.

Shaqooyinkaas waxaa ka mid ah dhismaha iyo howlgelinta hay’ado muhiim u ah socodsiinta shaqooyinka qaranka, sida Golaha Adeegga Garsoorka iyo Hay’adda Dakhliga Qaranka.

Qodobada qaar, durba dowladdu waa dhaqan gelisay gaar ahaan mudada xilka xukuumadda oo 5 sano ah, iyo in hal qof uusan isku noqon xildhibaan iyo wasiir, iyada oo Wasiirki ugu horeeyay uu banneeyay jagada xildhibaanimada, inkasta oo ay jiraan xildhibaano kale oo weli ku jira Golaha Wasiirrada kuwaas oo la sugayo jagada ay u go' doonaan maalmaha soo socda.