Muqdisho oo ansixisay Xeerkii ugu horreeyay ee nadaafadda caasimadda

Muqdisho (Dawan) – Maamulka Gobolka Banaadir ayaa ansixiyay xeerkii ugu horreeyay ee si gaar ah u nidaaminaya nadaafadda, maareynta qashinka iyo ilaalinta deegaanka ee caasimadda Muqdisho.

Guddoomiyaha Gobolka Banaadir ahna Duqa Muqdisho, Xasan Maxamed Xuseen (Muungaab), ayaa maanta oo Arbaco ah qalinka ku duugay xeerka cusub, isagoo sheegay inuu xoojinayo ka-qaybgalka bulshada iyo isla-xisaabtanka la xiriira nadaafadda caasimadda.

Maamulka Gobolka Banaadir ayaa sheegay in xeerka uu mamnuucayo in qashinka lagu daadiyo waddooyinka, biyo-mareennada iyo goobaha dadweynaha, arrintaas oo sababi karta xiritaanka bulaacadaha iyo fatahaado halis gelin kara dadka iyo hantida.

Sida uu sheegay Duqa Muqdisho, dadka iyo ganacsiyada jebiya xeerkan ayaa marka hore la siin doonaa digniin, waxaana ku xigi kara ganaax lacageed, hakinta ruqsadda, ama kala noqoshada shatiga ganacsiga haddii xadgudubku soo noqnoqdo. Kiisaska culus ayaa loo gudbin doonaa maxkamadaha awoodda u leh.

Duqa Muqdisho ayaa sidoo kale sheegay in bulshada la siin doono muddo 45 maalmood ah oo wacyigelin ah ka hor inta aan si buuxda loo bilaabin dhaqan-gelinta xeerka cusub.

Xeerka cusub ayaa sidoo kale nidaaminaya shirkadaha qaada qashinka, iyadoo Maamulka Gobolka Banaadir uu sheegay in shirkad aysan lacag ka qaadi karin bulshada iyada oo aan haysan heshiis iyo ruqsad rasmi ah. Sidoo kale, maamulka ayaa sheegay in tallaabo laga qaadi doono xoolaha si aan nidaamsanayn loogu sii daayo waddooyinka, kuwaas oo lagu eedeeyay inay waxyeelleeyaan bilicda magaalada, faafiyaan qashinka isla markaana sababi karaan shilal gaadiid.