Muqdisho, Maarso 31 (Dawan) – Mas’uuliyiin ka tirsan Dowladda Federaalka Soomaaliya iyo Qaramada Midoobay ayaa maanta oo Talaado ah kulan ku yeeshay Muqdisho si loo dardargeliyo fulinta qorshaha qaran ee wax ka qabashada sugnaanta cunnada, iyadoo abaarta iyo hubanti la’aanta cunnadu ay sii xumaanayaan, sida ay sheegtay Hay’adda Maareynta Musiibooyinka Qaranka (SoDMA).
Kulanka, oo ka dhacay xarunta SoDMA, ayaa isugu keenay mas’uuliyiin sare oo ka tirsan dowladda, hay’adaha Qaramada Midoobay iyo saaxiibada caalamiga ah, si loo xoojiyo isku-duwidda dadaallada ku aaddan Qorshaha U Diyaargarowga Dhibaatooyinka Sugnaanta Cunnada (FSCPP).
soomaaliya waxaa metelayay Xoghayaha Joogtada ah ee Xafiiska Ra’iisul Wasaaraha, Kamaal Guutaale, iyo Guddoomiyaha SoDMA, Maxamuud Macallin Cabdulle. Danaka Qaramada Midoobay waxaa goob joog ahaa Ku-xigeenka Ergayga Gaarka ah ee Qaramada Midoobay u qaabilsan Soomaaliya, George Conway, iyo wakiillo ka socday hay’adaha WFP, OCHA, UNICEF, FAO, Bangiga Adduunka iyo ururrada NGO-yada.
Mas’uuliyiintu waxay sheegeen in kulanka diiradda lagu saaray dardargelinta wejiga koowaad ee qorshaha FSCPP, kaas oo loogu talagalay wax ka qabashada saameynta sii kordheysa ee abaarta iyo amni darrada cunnada.
Ka qeybgalayaashu waxay sidoo kale dib u eegis ku sameeyeen horumarka deeqihii lagu ballanqaaday shirarkii hore ee deeq-bixiyeyaasha, iyagoo carrabka ku adkeeyay baahida loo qabo in la dedejiyo gaarsiinta gargaarka.
