New York (Dawan)– Xoghayaha Guud ee Qaramada Midoobay, António Guterres, ayaa ku dhawaaqay magacaabista muwaadinka Soomaaliyeed Maxamed Yahye inuu noqdo Kaaliyaha Xoghayaha Guud ee Qaramada Midoobay u qaabilsan Arrimaha Gargaarka Bini’aadantinimada iyo Ku-xigeenka Isku-duwaha Gargaarka Degdegga ah ee Xafiiska Isku-duwidda Arrimaha Bani’aadantinimada (OCHA).
Maxamed Yahye ayaa xilkan kala wareegaya Joyce Msuya oo u dhalatay Tanzania, taas oo muddo ka soo shaqeynaysay howlaha gargaarka bini’aadantinimada. Qaramada Midoobay ayaa uga mahadcelisay adeegga iyo kaalintii ay kasoo qabatay xilka.
Qaramada Midoobay ayaa sheegtay in Maxamed uu xilkan ku yimid isagoo leh in ka badan labaatan sano oo waayo-aragnimo ah oo ku saabsan horumarinta, gargaarka bini’aadantinimada iyo nabad-dhisidda. Mudadaas wuxuu kasoo shaqeeyay xarunta dhexe ee Qaramada Midoobay, xafiisyada gobollada iyo goobaha hawlgalka ee Afrika iyo Koonfurta Aasiya.
Ka hor magacaabistan, Maxamed Yaxye wuxuu ahaa Isku-duwaha Qaramada Midoobay ee Arrimaha Horumarinta iyo Gargaarka Bini’aadantinimada ee Pakistan, halkaas oo uu hoggaaminayay mid ka mid ah howlgalada ugu waaweyn ee Qaramada Midoobay ee gobolka Aasiya iyo Baasifigga, isla markaana uu isku dubbariday jawaabtii hay’addu ka bixisay fatahaadihii waaweynaa ee Pakistan sanadkii 2025.
