Muxuu Geelle ku tilmaamay Maalinta Qaranka Faransiiska?

Jabuuti (Dawan) – Madaxweynaha Jabuuti, Ismaaciil Cumar Geelle, ayaa Talaadadii ugu hambalyeeyay dhiggiisa Faransiiska, Emmanuel Macron, munaasabadda Maalinta Qaranka Faransiiska (Maalinta Bastille), isagoo dib u xaqiijiyay xiriirka adag ee u dhexeeya labada dal isla markaana muujiyay muhiimadda iskaashigooda dhinacyada difaaca iyo amniga.

Farriin uu Geelle diray munaasabadda 14-ka Luulyo, ayuu ugu rajeeyay Madaxweyne Macron guul iyo horumar, isagoo sidoo kale hambalyo u gudbiyay dowladda iyo shacabka Faransiiska isaga oo ku hadlaya magaca dowladda iyo shacabka Jabuuti, sida lagu sheegay war ka soo baxay Madaxtooyada Jabuuti.

Madaxweyne Geelle ayaa ku tilmaamay 14-ka Luulyo maalin lagu xuso qiyamka bani’aadantinimada ee caalamiga ah, isagoo sheegay inay astaan u tahay guusha xorriyadda ay ka gaartay dulmiga iyo kalitalisnimada.

Waxa uu sidoo kale ammaanay xiriirka soo jireenka ah ee u dhexeeya Jabuuti iyo Faransiiska, isagoo xusay in iskaashiga labada dal uu ku fidsan yahay dhinacyo kala duwan isla markaana uu ku saleysan yahay taariikh dheer oo is-garabsi, saaxiibtinimo iyo kalsooni.

“Dabeecadda gaarka ah ee xiriirka Jabuuti iyo Faransiiska waxay ka tarjumaysaa is-garabsi iyo kalsooni qoto dheer oo lagu yaqaan labada dal,” ayuu yiri Madaxweyne Geelle, isagoo si gaar ah u tilmaamay iskaashiga labada dhinac ee la xiriira difaaca iyo amniga.

Faransiiska ayaa saldhig ciidan ku leh Jabuuti tan iyo markii ay dalkaasi xornimada ka qaatay Faransiiska sanadkii 1977. Labada dal ayaa si dhow uga wada shaqeeya arrimaha amniga gobolka, difaaca, horumarinta dhaqaalaha iyo waxbarashada, iyagoo wada leh iskaashi istiraatiiji ah oo muddo dheer soo jiray.

Jabuuti ayaa sidoo kale martigelisa saldhigga milatariga ugu weyn ee Faransiisku ku leeyahay qaaradda Afrika, taasoo ka tarjumaysa muhiimadda istiraatiijiyadeed ee dalkaasi, maadaama uu ku yaallo meel u dhow mid ka mid ah marin-biyoodka ugu mashquulka badan caalamka, isla markaana uu yahay xulafo muhiim u ah Paris dhinaca amniga iyo xasilloonida gobolka.