Muqdisho (Dawan) – Xafiiska Madaxweynihii hore ee Soomaaliya, Sheekh Shariif Sheekh Axmed, ayaa beeniyay eedeyn ay maanta soo saartay Hay’adda Sirdoonka iyo Nabadsugidda Qaranka (NISA), taas oo la xiriirtay weerar ay sheegtay in ciidamo hubaysan oo isaga taabacsan ay ku qaadeen ciidamada amniga ee ka hawlgala degmada Wadajir ee gobolka Banaadir.
War-saxaafadeed uu soo saaray xafiiska Sheekh Shariif ayaa lagu sheegay in eedeynta NISA aysan ka tarjumayn xaqiiqada, isla markaana ay qayb ka tahay warbixinno uu xafiisku ku tilmaamay kuwo looga dan leeyahay marin-habaabinta shacabka iyo sumcad-dilka siyaasiyiinta mucaaradka.
Xafiiska ayaa sidoo kale sheegay in maalmihii u dambeeyay jidgooyooyin iyo xannibaado lagu sameeyay waddooyinka ku dhow guriga madaxweynihii hore, kuwaas oo saameeyay isu-socodka iyo gaarsiinta adeegyada daruuriga ah, gaar ahaan raashinka iyo biyaha loo waday gurigiisa.
War-saxaafadeedka ayaa intaa ku daray in qaar ka mid ah shaqaalaha xarunta madaxweynihii hore la afduubay, ciidamo hubaysanna la dhigay goobo ku dhow gurigiisa. Xafiisku wuxuu sheegay in marar badan ay ka fogaadeen falcelin, si looga fogaado dhibaato soo gaarta shacabka deegaanka.
