Muxuu yahay heshiiska cusub ee Soomaaliya u furaya suuqa Shiinaha ee kalluunka?

Waxa uu intaa ku daray in Wasaaradda Kalluumeysiga iyo Dhaqaalaha Buluugga ah ay xoojisay iskaashiga ay la leedahay Shiinaha iyada oo loo marayo barnaamijyo tababar iyo is-weydaarsi aqooneed, kuwaas oo arday iyo xirfadlayaal Soomaaliyeed oo ku takhasusay kalluumeysiga ay waxbarasho iyo tababar farsamo uga helaan Shiinaha.

Dhankiisa, Safiirka Shiinaha ee Soomaaliya, Wang Yu, ayaa uga mahadceliyay dowladda Soomaaliya wada shaqeynta lagu gaaray heshiiskan, isaga oo sheegay inuu rajeynayo in borotokoolkani fududeyn doono ganacsiga labada dal isla markaana uu suuq weyn u abuuri doono kalluunka iyo cuntooyinka badda ee Soomaaliya.

Soomaaliya ayaa leh mid ka mid ah xeebaha ugu dheer Afrika oo dhererkoodu ka badan yahay 3,300 kiiloomitir, hase yeeshee waaxda kalluumeysigu weli si buuxda loogama faa'iideysan inkastoo dalka uu hodan ku yahay kheyraadka badda.

Dowladda Federaalka Soomaaliya ayaa dhaqaalaha buluugga ah u aqoonsatay tiir muhiim u ah kobcinta dhaqaalaha, abuurista shaqooyin iyo kordhinta dhoofinta, iyadoo heshiiskan cusub lagu tilmaamay tallaabo lagu ballaarinayo helitaanka suuqyada caalamiga ah ee wax soo saarka Soomaaliyeed.

Heshiiskan ayaa sidoo kale waafaqsan siyaasadda Shiinaha ee ballaarinta helitaanka suuqyada ee wax soo saarka dalalka ugu saboolsan, taas oo u oggolaaneysa badeecooyin ka yimaada dalal badan oo Afrika ah inay galaan suuqa Shiinaha iyagoo ka caagan canshuuraha kastamka.