Nairobi (Dawan)- Wasiirrada Maaliyadda ee dalalka ku bahoobay Hindisaha Geeska Afrika ayaa maanta magaalada Nairobi ku ansixiyay qorshe-hawleed cusub oo lagu horumarinayo ganacsiga iyo is-dhexgalka dhaqaale ee gobolka.
Kulanka 29-aad ee Madasha Iskaashiga Geeska Afrika ayaa waxaa shir-guddoomiyay Wasiirka Maaliyadda Soomaaliya, Biixi Iimaan Cige. Kulanka waxaa ka qeybgalay qaar ka mid ah wasiirrada dalalka ku bahoobay madasha, wakiillo ka socday dowladaha deeq-bixiyeyaasha iyo hay’adaha caalamiga ah.
Kulanka oo hal maalin socday ayaa diiradda lagu saaray xoojinta is-dhexgalka gobolka iyo iskaashiga dhaqaale, iyo sidoo kale kordhinta maalgelinta meelaha mudnaanta u leh dalalka Geeska Afrika.
Qorshaha waxaa ka mid ahaa horumarinta kaabayaasha dhaqaalaha, gaar ahaan korontada, biyaha iyo waddooyinka isku xira dalalka gobolka. Kaabayaashaasi waxay muhiim u yihiin fududeynta isu-socodka iyo ganacsiga dalalka Geeska Afrika.
