Muqdisho (Dawan) — Hay’adda Aqoonsiga iyo Diiwaangelinta Qaranka (NIRA) ayaa Soomaaliya ku matali doonta Abaalmarinta Tayada Gobolka ee Bulshada Bariga Afrika (EAC), taas oo la qorsheeyay in 2-da November 2026 lagu qabto magaalada Kigali ee caasimadda Rwanda.
Ka qaybgalka NIRA ee tartankan heer gobol ayaa imanaya kaddib markii hay’addu ku guuleysatay Abaalmarinta Hay’adda ugu Adeeg-bixinta Fiican ee Hay’adaha Adeegga Dadweynaha 2026, taas oo lagu tartansiiyay hay’adaha dowladda Soomaaliya ee bixiya adeegyada dadweynaha.
Maareeyaha NIRA, Cabdiwali Cali Cabdullaahi, ayaa sheegay in guushan ay muujinayso dadaalka ay hay’addu gelisay horumarinta tayada iyo ballaarinta adeegyada aqoonsiga qaranka.
“Tani waxay muujinaysaa dadaalka ay hay’addu ku bixisay tayeynta adeegga aqoonsiga qaranka,” ayuu yiri maareeyuhu.
Abaalmarinta heer qaran waxaa munaasabadda ku guddoomay Maareeye Ku-xigeenka NIRA, Cabdiraxmaan Siciid Axmed, taas oo hay’addu ku tilmaantay aqoonsi ka tarjumaya horumarka ay ka samaysay bixinta adeegyo tayo leh.
