Muqdisho (Dawan)- Ciidanka Hay’adda Sirdoonka iyo Nabadsugidda Qaranka (NISA), oo kaashanaya saaxiibada caalamka, ayaa howlgallo ka fuliyay deegaannada Guulane iyo Al-Furqaan ee Gobolka Shabeellaha Dhexe, kuwaas oo lagu dilay hoggaamiye iyo saddex dagaalyahan oo ka tirsanaa Al-Shabaab, halka hoggaamiye kale lagu dhaawacay, sida lagu sheegay warsaxaafadeed kasoo baxay NISA.
Warsaxaafadeedka ayaa intaas ku daray in howlgalladu ay dhaceen xilli xubnaha Al-Shabaab ay kasoo baxeen kulan ka dhacay deegaanka Guulane.
Afarta qof ee lagu dilay howlgalka ayaa waxaa ka mid ahaa Cumar Siyaad Caraaye, oo ahaa hoggaamiye lagu tilmaamay inuu Al-Shabaab u qaabilsanaa mid ka mid ah beelaha dega Gobolka Shabeellaha Dhexe, laba dagaalyahan oo waday mootooyinka ay saarnaayeen hoggaamiyeyaasha iyo xubin kale oo ilaalo u ahaa.
