Puntland oo Dowladda Federaalka ku eedeysay “af-duub diyaaradeed”

Soomaaliya, 2 Maarso 2026( Dawan)– Dowlad goboleedka Puntland ayaa Isniintan ku eedaysay Dowladda Federaalka Soomaaliya inay ku kacday “af-duub diyaaradeed” kadib markii diyaarad rayid ah oo siday xildhibaanno federaal ah la sheegay in laga soo celiyay hawada.

Bayaan ka soo baxay Madaxtooyada Puntland ayaa lagu sheegay in diyaaradda, oo qorshuhu ahaa inay ku degto Garoowe, lagu qasbay inay dib ugu laabato Muqdisho 1-dii Maarso.

Maamulka ayaa dhacdadan ku tilmaamay “fal mas’uuliyad-darro ah” oo khatar geliyay nolosha rakaabkii saarnaa, oo ay ku jireen xubno ka tirsan labada Aqal ee Baarlamaanka Federaalka ee ku matala Puntland.

“Kani waa fal sharci-darro ah, kali-talisnimo ah, isla markaana meel ka dhac ku ah sharafta Soomaaliya,” ayay tiri Madaxtooyada Puntland.

Bayaanka ayaa sidoo kale xusay in duulimaadka ay saarnaayeen muwaadiniin badan oo u safrayay gudashada cumrada.

Mas’uuliyiinta Puntland ayaa dhacdadan ku tilmaamay “isku daygii labaad ee dil ah” oo lala beegsaday mas’uuliyiinta maamulka muddo bil gudaheed ah.

Puntland ayaa ugu baaqday Ururka Caalamiga ah ee Duulista Hawada (ICAO) inay soo farageliyaan, iyagoo ku eedeeyay Muqdisho inay hawada Soomaaliya u adeegsanayso sidii “hub” siyaasadeed oo lagu caburiyo mucaaradka isla markaana lagu hakiyo socdaalka rayidka. Dowladda Federaalka Soomaaliya weli kama aysan jawaabin si rasmi ah eedeymahaas.