Muqdisho (Dawan ) 29 March 2026 Qaramada Midoobay ayaa ka digtay khataro sii kordhaya oo ku wajahan rayidka ku nool Dowlad Goboleedka Koonfur Galbeed Soomaaliya, iyadoo muujisay walaac laga qabo suurtagalnimada iska horimaadyo ciidan oo saameyn ku yeelan kara bulshada rayidka ah oo hadda la daalaa dhaceysa abaarta dhaba dheeraatay ee ka taagan deegaanadaas.
Ku-xigeenka Ergeyga Gaarka ah ee Xoghayaha Guud ee Qaramada Midoobay u qaabilsan Soomaaliya, ahna Iskuduwaha Gargaarka Bini’aadannimada, George Conway, ayaa hadalkan ka jeediyay Shirka Arrimaha Bini’aadannimada Soomaaliya (CHF), isagoo xusay in dhaq-dhaqaaqyo ciidan oo dhowaan la arkay ay sare u qaadeen walaaca ku saabsan badqabka rayidka.
“Waxaan aragnay dhaqdhaqaaqyo ciidan maalmahan la soo dhaafay, waxaana si gaar ah uga walaacsanahay saameynta ay ku yeelan karaan dadka rayidka ah,” ayuu yiri Conway.
Wuxuu ugu baaqay dhammaan dhinacyada inay u hoggaansamaan sharciga caalamiga ah ee bini’aadannimada, ilaaliyaan rayidka, isla markaana hubiyaan in gargaarka bani’aadannimo uu si nabad ah u gaaro dadka u baahan.
