Doha (Dawan) — Qatar ayaa maanta oo Axad ah cambaaraysay colaadda ka dhanka ah ciidamada federaalka Itoobiya, waxayna ku baaqday in dagaalka si degdeg ah loo joojiyo. Waxay sheegtay in xiisaddu khatar ku tahay midnimada Itoobiya iyo xasilloonida Geeska Afrika.
War ka soo baxay Wasaaradda Arrimaha Dibadda Qatar ayaa lagu dalbaday in la ilaaliyo dadka rayidka ah, lana dhowro heshiiskii nabadda ee Pretoria. Heshiiskaas ayay dowladda federaalka Itoobiya iyo Jabhadda Xoreynta Shacabka Tigray (TPLF) saxiixeen sannadkii 2022 si loo soo afjaro dagaalkii labada sano socday. Qatar waxay sheegtay inay taageerayso dadaallada khilaafka lagu xallinayo wada hadal iyo hab nabadeed.
