Muqdisho (Dawan) — Dowladda Soomaaliya ayaa waddo qorshaha ballaaran loogu magac daray “Muqdisho Cusub”, kaas oo ka mid ah mashaariicda waaweyn ee lagu doonayo in lagu horumariyo kaabeyaasha dhaqaalaha caasimadda, iyadoo qayb muhiim ah uu ka yahay dhismaha garoon diyaaradeed iyo dekad cusub.
Ra’iisul Wasaaraha Soomaaliya, Xamse Cabdi Barre, ayaa sheegay in dowladda ay kala hadashay Qatar sidii ay uga qayb qaadan lahayd dhismaha garoonka cusub.
“Markaan Qatar joogay ayaan Qatar kala hadlay inay iyagu dhisaan airport-ka. Waxaa kale oo jira Turki raba inay dhisaan,” ayuu yiri Ra’iisul Wasaaruhu, isagoo wareysi siinayay barnaamijka Mizan Podcast.
Ra’iisul Wasaaruhu wuxuu sheegay in dowladda Soomaaliya iyo Qatar ay gaareen is-afgarad ku saabsan dhismaha garoonka, balse uu xusay in mashaariicda waaweyn ee noocan ah ay u baahan yihiin waqti iyo diyaar-garow.
Marka laga yimaado danaha Qatar iyo Turkiga, dowladda Soomaaliya waxay hore u sheegtay in qorshaheedu ahaa in ganacsatada Soomaaliyeed ay sidoo kale qayb ka noqdaan maalgelinta iyo dhismaha mashaariicda ku jira qorshaha Muqdisho Cusub.
Dowladda Soomaaliya ayaa sanadkii 2024 ku dhawaaqday qorshaha Muqdisho Cusub, kaas oo ka kooban dhismaha garoon diyaaradeed oo cusub iyo dekad cusub. Qorshaha dowladda ayaa dhigaya in garoonka diyaaradaha uu noqdo mid ka mid ah mashaariicda ugu horreeya ee la hormariyo.
