Qiimeyn: SIMAD oo loo aqoonsaday Jaamacadda ugu fiican Soomaaliya

Muqdisho (Dawan) — Jaamacadda SIMAD ayaa sanadkii labaad oo xiriir ah loo aqoonsaday jaamacadda ugu fiican Soomaaliya, sida lagu caddeeyay qiimeynta jaamacadaha Carabta ee sanadka 2025, ee uu sameeyay Ururka Midowga Jaamacadaha Carbeed.

Qiimeyntan, waxaa sanad kasta wada sameeya Ururka Midowga Jaamacadaha Carbeed iyaga Ururka Waxbarashada, Dhaqanka, iyo Sayniska (ALECSO). SIMAD ayaa guud ahaan heshay 182.4 dhibcood, iyada oo laga qiimeeyay qaybaha kala duwan ee waxbarashada, Cilmibaarista, Hal-abuurka, iyo arrimaha Bulshada, taas oo ka dhigtay jaamacadda ugu dhibcaha badan dalka.

Sidoo kale, qiimeyntan ayaa SIMAD ka dhigtay jaamacadda 103-aad guud ahaan jaamacadaha Carabta, iyada oo sameeysay kor kac dhan 10 kaalin, marka la barbardhigo sanadkii hore oo ay ka gashay kaalinta 113-aad.

War qoraal ah oo ka soo baxay Jaamacadda ayaa lagu sheegay in guusha SIMAD ay marqaati ka tahay tayada waxbarashada, cilmibaarista, iyo aragtida fog ee ku dhisan hal-abuur iyo horumar waara.

Jaamacadaha kale ee Muqdisho, Jamhuuriya iyo Zamzam ayaa sidoo kale soo galay kaalmaha 172, 218 iyo 224, waxaana liiska kasoo muuqday in ka badan 230 jaamacadood oo dalalka Carabta ku yaalla.

Guusha Jaamacadda SIMAD ayaa muujinaysa doorka muhiimka ah ee waxbarashadu ka ciyaarto horumarinta bulshada, kobcinta aqoonta, iyo xirfadaha bulshada Soomaaliyeed.