Muqdisho (Dawan) – Ra’iisul Wasaare Ku-xigeenka Dowladda Federaalka Soomaaliya, Saalax Axmed Jaamac, ayaa sheegay in Soomaaliya ay hormar muuqda ka sameysay dhinacyada dimuqraadiyadda, doorashooyinka iyo ku dhaqanka sharciga, xilli dalka ay ka socdaan doorashooyin qof iyo cod ah.
Saalax Axmed Jaamac ayaa hadalkan ka sheegay shir jaraa’id oo looga hadlayay wada-hadalka u dhexeeya Soomaaliya iyo Midowga Yurub, isagoo xusay in arrimaha doorashooyinka, dastuurka iyo dowlad wanaagga ay muddo dheer qeyb ka ahaayeen doodaha siyaasadeed ee Soomaaliya.
“Waxaan ku faraxsanahay inaan maanta halkan ka sheegno in shacabka Soomaaliyeed ay safaf ugu jiraan inay codkooda dhiibtaan si ay u doortaan wakiilladooda doorashooyinka dowladaha hoose iyo kuwa heer dowlad goboleed ee Koonfur Galbeed,” ayuu yiri Ra’iisul Wasaare Ku-xigeenka.
Wuxuu sheegay in magaalooyin badan oo ka tirsan Koonfur Galbeed ay shacabka rag iyo dumarba safaf ugu jiraan codbixinta, taas oo uu ku tilmaamay tallaabo taariikhi ah oo dhowr sano kahor loo arkayay wax aan suuragal ahayn.
