Muqdisho (Dawan)– Ra’iisul Wasaaraha Soomaaliya Xamse Cabdi Barre ayaa ballanqaaday in dowladda federaalku dib u dhisi doonto Buundada Baardheere ee gobolka Gedo, isagoo sidoo kale sheegay in dowladda ay dadka gobolka u tegi doonto oo ay wax ka qaban doonto arrimaha ay bulshada deegaanku raalli ka tahay, sida uu ku sheegay wareysi uu siiyay Miizaan Podcast oo ka baxa Dawan TV.
“Waan ballanqaadaynaa, buundadaas waan dhisaynaa,” ayuu yiri Xamse.
Ra’iisul Wasaaraha ayaa Gedo ku tilmaamay gobol leh duruufo gaar ah, isagoo xusay inuu ka mid yahay gobollada waaweyn ee Soomaaliya, isla markaana uu u nugul yahay abaaraha iyo daadadka.
Xamse ayaa ku eedeeyay maamulka Jubaland inuu dayacay gobolka Gedo muddadii uu jiray, isagoo sheegay in markii dowladdiisu timid ay jireen maamullo kala duwan oo deegaanka ka shaqeynayay.
Ra’iisul Wasaaraha ayaa sheegay in Madaxweyne Xasan Sheekh Maxamuud uu hore deegaanka uga magacaabay maamul ay dadka deegaanku oggolaayeen, balse wuxuu dhaliilay inaan madaxda Jubaland si joogto ah u tegin magaalooyinka gobolka.
Wuxuu sidoo kale sheegay in gobolka uu wajahayo dhibaatooyin dhinaca kaabeyaasha dhaqaalaha ah, isagoo burburka Buundada Baardheere ku tilmaamay mid ka mid ah caqabadaha ugu waaweyn ee hadda jira.
