Muqdisho (Dawan) – Ra’iisul Wasaarihii hore ee Soomaaliya, Cumar Cabdirashiid Cali Sharmaarke, ayaa sheegay in Soomaaliya ay tahay inay yeelato guddiyo doorasho oo kala madax-bannaan heer federaal iyo heer dowlad-goboleed, si loo ilaaliyo nidaamka federaalka loona yareeyo khilaafaadka siyaasadeed ee la xiriira doorashooyinka.
Cumar ayaa hadalkan ka sheegay wareysi uu siiyay Miizaan Podcast ee Dawan Media, isagoo xusay in dowlad-goboleedyadu ay tahay inay si madax-bannaan u maamulaan doorashooyinkooda, halka doorashooyinka federaalkana uu maamulo guddi qaran oo ay ku kalsoon yihiin dhammaan dhinacyada siyaasadda.
Wuxuu ka digay in dhammaan doorashooyinka laga hoos geeyo hal guddi oo keliya, taasoo uu sheegay inay keeni karto awood ururin xad-dhaaf ah oo ka dhacda Muqdisho isla markaana wiiqi karta nidaamka federaalka.
Cumar ayaa sheegay in dowladda federaalku ay tahay inay ka fogaato faragelin toos ah oo ku saabsan doorashooyinka heer dowlad-goboleed.
Wuxuu intaas ku daray in khilaafaadka ka dhasha doorashooyinka heer gobol ay tahay in lagu xalliyo hay’adaha dastuuriga ah iyo garsoorka.
Sidoo kale, wuxuu carrabka ku adkeeyay baahida loo qabo maxkamad dastuuri ah iyo maxkamad sare oo madax-bannaan, kuwaas oo awood u leh inay xalliyaan murannada u dhexeeya dowladda federaalka iyo dowlad-goboleedyada.
