Muqdisho (Dawan)— Wasaaradda Deegaanka iyo Isbeddelka Cimilada Soomaaliya ayaa saadaalisay roobab kala xooggan oo laga filayo inta badan gobollada dalka muddada u dhexeysa 10-ka iyo 15-ka Oktoobar 2026, iyadoo qaybo ka mid ah koonfurta, bartamaha iyo waqooyiga Soomaaliya laga filayo roobab xooggan oo sababi kara daadad.
Sida lagu sheegay saadaasha ay wasaaraddu soo saartay, qaybo ka mid ah gobollada Gedo, Bay, Bakool, Hiiraan, Galgaduud, Mudug, Sool iyo Nugaal ayaa laga filayaa roobab gaaraya 50 ilaa 100 millimitir, halka meelaha qaar ay ka da'i karaan roobab ka badan 100 millimitir. Degmooyinka laga filayo roobabka xooggan waxaa ka mid ah Luuq, Doolow, Garbahaarey, Baydhabo, Buurhakaba, Xudur, Beledweyne, Buulo Burte, Dhuusamareeb, Guriceel, Gaalkacyo iyo Laascaanood.
Wasaaraddu waxay sidoo kale saadaalisay roobab dhexdhexaad ah oo gaaraya 20 ilaa 50 millimitir, kuwaas oo laga filayo qaybo ka mid ah gobollada Jubbada Hoose, Jubbada Dhexe, Shabeellaha Hoose, Shabeellaha Dhexe, Banaadir, Togdheer, Sanaag, Bari iyo Waqooyi Galbeed. Deegaannada ay saadaashani khusayso waxaa ka mid ah Kismaayo, Afmadow, Bu'aale, Jilib, Afgooye, Marka, Jowhar, Muqdisho, Burco, Ceerigaabo, Qardho iyo Hargeysa.