Muqdisho (Dawan) — Qoraal kooban oo Wasiirka Gaashaandhigga Soomaaliya, Axmed Macallin Fiqi, uu ku daabacay bartiisa Facebook, kuna koobnaa weedha Carabiga ah ee “السفارة في العمارة”, oo micne ahaan noqonaysa “Safaaraddu waxay ku dhex taal Dhismaha”, ayaa dhalisay su’aalo iyo fasiraado siyaasadeed oo ku saabsan cidda ama hay’adda uu fariintaas ula jeeday.
Qoraalka Fiqi ayaa soo baxay saacado kadib markii Maxkamadda Sare ee Soomaaliya ay burisay natiijadii doorashooyinka isku sidkanaa ee Galmudug, kuwaas oo ay maxkamaddu sheegtay in aan loo qaban si waafaqsan Dastuurka iyo Sharciga Doorashooyinka.
Go’aanka Maxkamadda Sare ayaa lagu sheegay in doorashooyinkii Baarlamaanka iyo goleyaasha deegaanka Galmudug ee dhacay 30-kii Luulyo 2026 ay ahaayeen kuwo aan waafaqsanayn habraaca dastuuriga iyo sharciga doorashooyinka. Maxkamaddu waxay guddiga doorashooyinka ku amartay in sida ugu dhaqsaha badan loo qabto doorashooyin cusub, iyadoo hay’adaha hadda jira loo oggolaaday inay sii shaqeeyaan inta hay’ado cusub si sharci ah looga dhisayo.
Fiqi ma uusan magacaabin Maxkamadda Sare, guddiga doorashooyinka, maamulka Galmudug ama cid kale oo fariintiisa ku saabsan. Sidoo kale ma uusan sharxin sababta uu xilligan u adeegsaday magaca filim Masri ah oo cinwaankiisu yahay “السفارة في العمارة”.
