Muqdisho (Dawan)- Wasiir-ku-xigeenka Wasaaradda Arrimaha Dibadda iyo Iskaashiga Caalamiga ah ee Soomaaliya, Xasan Maxamed Cali (Nadaara), ayaa maanta oo Arbaco ah ka aqblay warqadaha aqoonsiga Safiirka cusub ee Turkiga u fadhiya Soomaaliya, Ferhat Alkan.
Intii uu kulanku socday, Xasan Maxamed Cali ayaa soo dhaweeyay Safiir Alkan, isagoo Soomaaliya iyo Turkiga ku tilmaamay laba dal oo walaalo ah oo ay ka dhexeeyaan diin, taariikh iyo xiriir soo jireen ah, sida lagu sheegay qoraal ka soo baxay Wasaaradda Arrimaha Dibadda Soomaaliya.
Labada dhinac ayaa sidoo kale ku celiyay sida ay uga go’an tahay in la sii xoojiyo iskaashiga labada dal ee dhinacyada amniga, ganacsiga, horumarinta iyo waxbarashada, ayay wasaaradda sheegtay.
Safiir Ferhat Alkan ayaa si rasmi ah xilkiisa safiirnimo ee Soomaaliya u bilaabay 21-kii Sebtembar 2026, sida lagu sheegay xogta Safaaradda Turkiga ee Muqdisho.
