Safiirka Soomaaliya ee Azerbaijan oo gudbiyey waraaqaha aqoonsiga

Baku (Dawan) – Safiirka cusub ee Jamhuuriyadda Federaalka Soomaaliya u fadhin doona Jamhuuriyadda Azerbaijan, Cabdinuur Daahir Fiidow, ayaa si rasmi ah u gudbiyey nuqul ka mid ah waraaqaha aqoonsiga danjirenimo, waxaana ka guddoomay Wasiirka Arrimaha Dibadda Azerbaijan, Jeyhun Bayramov.

Munaasabadda ayaa ka dhacday xarunta Wasaaradda Arrimaha Dibadda ee Azerbaijan, iyadoo labada dhinac ay ka wada hadleen xoojinta xiriirka laba geesoodka ah iyo iskaashiga u dhexeeya labada dal.

Safiirka cusub ayaa muujiyay sida ay uga go’an tahay horumarinta iskaashiga dhinacyada dhaqaalaha, waxbarashada, iyo amniga, halka Wasiir Bayramov uu adkeeyay muhiimadda ay leedahay dhisidda iskaashi waara oo miro-dhal ah.

Azerbaijan iyo Soomaaliya ayaa bishii Febraayo 2025 kala saxiixday heshiisyo ay ka mid yihiin waxbarashada, deeqaha waxbarasho, cilmi-baarista, iyo horumarinta tamarta, xilli Madaxweynaha Soomaaliya Xasan Sheekh Maxamuud uu booqasho rasmi ah ku tegay dalkaas.