Muqdisho (Dawan) – Shirkadda Likenew Smart Laundry ayaa magaalada Muqdisho ka hirgelisay adeeg casri ah oo dhar-dhaqis ah, kaas oo macaamiisha u oggolaanaya inay dharkooda iyo kabahooda dhigtaan ama kala soo baxaan xarunta shirkadda xilli kasta, habeen iyo maalinba.
Adeeggan cusub oo loo yaqaan Likenew Smart Lockers ayaa ku shaqeynaya barnaamij dijitaal ah (application), kaas oo macaamiisha u sahlaya inay si fudud uga dalbadaan adeegyada dhar-dhaqidda iyo dhar-qaadista, iyaga oo aan u baahnayn in ay sugaan shaqaale ama adeeg toos ah.
Marka macaamilku yimaado xarunta, wuxuu adeegsanayaa application-ka Likenew, kadibna wuxuu dooranayaa adeegga uu doonayo—dhar dhigasho ama dhar qaadasho. Nidaamku wuxuu siinayaa qaanad gaar ah oo lambar leh, halkaas oo uu dharkiisa ku ridi karo ama uu kala soo bixi karo dhar horey loogu soo dhaqay.
Dharka iyo kabaha la dhigo qaanadahaas waxaa si joogto ah ula socda shaqaalaha shirkadda, kuwaas oo qaada, dhaqaya, kadibna dib ugu soo celiya qaanadda macaamilka loogu talagalay. Nidaamkan ayaa lagu tilmaamay mid fudud, ammaan ah, isla markaana ku habboon dadka waqtigu ku yar yahay.
Adeeggan cusub ayaa meesha ka saaraya xaddidaaddii hore ee saacadaha shaqada xarunta, oo hore u furnaan jirtay 8:00 subaxnimo illaa 11:00 habeenimo. Hadda, adeegga Smart Lockers wuxuu macaamiisha siinayaa fursad ay 24 saac maalintii, toddobada maalmood ee usbuuca, adeegga ku heli karaan.
Mas’uuliyiinta shirkadda ayaa sheegay in nidaamkan cusub uu si gaar ah u caawinayo dadka shaqooyinka ku mashquulsan ee aan helin waqti ku filan oo ay dharkooda ku geeyaan ama kaga soo qaataan xarunta xilliyada caadiga ah.
Sidoo kale, adeegga Smart Lockers ayaa la filayaa inuu gaarsiiyo adeegga macaamiil ka fog xarumaha waaweyn, maadaama shirkaddu qorsheynayso inay xarumo noocan ah ka furto degmooyin kala duwan oo ka tirsan gobolka Banaadir, si adeegga loogu soo dhoweeyo bulshada.
