Sidee Boolisku u sugaya amniga doorashooyinka?

Muqdisho (Dawan)— Taliska Ciidanka Booliska Soomaaliyeed ayaa soo bandhigay qorshaha amni ee lagu xaqiijinayo badbaadada doorashooyinka golayaasha deegaanka ee ka dhacaya degmooyinka gobolka Banaadir, kuwaas oo la filayo inay qabsoomaan Khamiista, 25-ka Diseembar 2025. Qorshahan waxaa saldhig u ah xaddidaadda dhaqdhaqaaqa guud ee magaalada inta lagu guda jiro maalinta codbixinta.

Go’aanka xaddidaadda socodka ayaa ka dhashay kulan degdeg ah oo uu Taliyaha Ciidanka Booliska Soomaaliyeed, S/Guuto Asad Cusmaan Cabdullaahi, la yeeshay dhammaan saraakiisha hoggaannada, qaybaha iyo fadhiyada gaarka ah ee Booliska, kaas oo lagu gorfeeyay xaaladda amni, khataraha suuragalka ah, iyo tallaabooyinka looga hortagayo wax kasta oo carqalad ku noqon kara hannaanka doorashada.

Qorshaha amni ee Booliska ayaa diiradda saaraya dhowr qodob oo muhiim ah, kuwaas oo ay ka mid yihiin xakamaynta isu-socodka gaadiidka iyo dadweynaha, adkaynta amniga goobaha codbixinta, iyo sugidda badbaadada shaqaalaha doorashada iyo codbixiyayaasha. Taliyaha Booliska ayaa saraakiisha ku amray in ay si buuxda ugu diyaargaroobaan maalinta doorashada, isla markaana ay mudnaan siiyaan fududeynta shacabka si ay codkooda ugu dhiibtaan jawi amni oo deggan.

Afhayeenka Ciidanka Booliska Soomaaliyeed, Cabdifitaax Aadan Xasan, oo warbaahinta la hadlay kaddib kulanka, ayaa sheegay in xaddidaadda dhaqdhaqaaqa ay tahay tallaabo ka hortag ah oo looga golleeyahay yareynta halis kasta oo amni, lana hubiyo in doorashadu u dhacdo si habsami leh. Wuxuu xusay in ciidamadu ay ku jiri doonaan heegan buuxa, isla markaana si dhow ula shaqeyn doonaan hay’adaha kale ee amniga.

Afhayeenku wuxuu intaas ku daray in Boolisku diyaariyay gaadiid iyo kooxo gaar ah oo loogu talagalay ka jawaabidda xaaladaha degdegga ah, si loogu gargaaro dadka qaba duruufaha u baahan caawimaad degdeg ah.