Kenya (Dawan ) – Jaamacadda SIMAD ayaa daahfurtay qorshe istiraatiiji ah oo shan sano ah, kaas oo lagu xoojinayo cilmi-baarista, hal-abuurka iyo isbeddelka dijitaalka, sida lagu sheegay war-saxaafadeed ay jaamacaddu soo saartay.
Qorshaha 2026–2030 ayaa si rasmi ah loogu daahfuray munaasabad ay ka soo qeyb galeen hoggaanka jaamacadda oo lagu qabtay magaalada Nyeri ee dalka Kenya, iyadoo lagu soo bandhigay qorshe diiradda saaraya horumarinta waxbarashada, cilmi-baarista sayniska iyo horumarinta tiknoolajiyadda.
Isagoo ka hadlayay munaasabadda, Guddoomiyaha Jaamacadda SIMAD, Cabdikariim Maxamuud Axmed, ayaa sheegay in qorshahan uu calaamad u yahay marxalad cusub oo horumarineed oo jaamacadda u bilaabatay.
“Waxaan galeynaa marxalad muhiim ah oo u baahan go’aanno istiraatiiji ah si loo dhiso hay’ad aqooneed oo awood u leh inay saameyn muuqata ku yeelato bulshada,” ayuu yiri.
Sida lagu sheegay war-saxaafadeedka, qorshahan waxa uu ku dhisan yahay shan tiir oo muhiim ah: xoojinta tayada waxbarashada, horumarinta cilmi-baarista, ballaarinta isbeddelka dijitaalka, xoojinta xiriirka bulshada iyo hagaajinta hufnaanta iyo maamulka hay’adda.
