Muqdisho (Dawan) — Hay’adda Maareynta Musiibooyinka Soomaaliyeed (SoDMA) iyo Hay’adda Cunnada Adduunka (WFP) ayaa kala saxiixday heshiis shan sano ah oo lagu xoojinayo diyaar-garowga musiibooyinka, sida ay SoDMA ku sheegtay war ay Khamiistii soo saartay. Heshiiska waxaa Muqdisho ku kala saxiixday Guddoomiyaha SoDMA Maxamuud Macallin Cabdulle iyo madaxa WFP ee Soomaaliya, Hameed Nuru.
SoDMA waxay sheegtay in iskaashigu diiradda saarayo saadaalinta khataraha, hagaajinta digniinta hore, qaadista tallaabooyin ka hor inta aysan musiibooyinku sii xumaan iyo ka jawaabista xaaladaha degdegga ah. Waxa kale oo uu khuseeyaa sugnaanta cuntada iyo taageerada bulshooyinka ay musiibooyinku saameeyaan.
Heshiiska ayaa imanaya iyadoo WFP iyo dowladda Soomaaliya ay ka digeen in 5.4 milyan oo qof ay wajihi karaan cunto yari heerka qalalaasaha ama ka daran inta u dhexeysa Oktoobar iyo Diseembar.
