Soomaaliya (Dawan)– Hay’adda Maareynta Musiibooyinka Qaranka Soomaaliyeed (SoDMA) ayaa Axaddii gaarsiisay 100 booyadood oo biyo ah Baxdo ee Dowlad-goboleedka Galmudug, xilli ay dowladda dardargelinayso dadaallada gargaarka degdegga ah ee lagula tacaalayo abaarta sii kordhaysa.
Gaarsiinta gargaarkan waxaa kormeerayay Guddoomiyaha SoDMA, Maxamuud Macallin Cabdulle, oo hoggaaminaya wafdi socdaal ku maraya deegaannada Galmudug si ay u qiimeeyaan saameynta abaarta ku habsatay bulshooyinka xoolo-dhaqatada ah.
“Waxaan halkan u nimid inaan dhageysano guddiyada gurmadka ee maxalliga ah, si aan u hubinno in jawaabteennu la jaanqaadayso baaxadda dhibaatada jirta,” ayuu yiri Cabdulle intii uu ku sugnaa Cadaado ka hor inta uusan u gudbin Baxdo. “Hay’addu waxay ka go’an tahay inay kordhiso taageerada qoysaska ugu nugul ee waayay hantidoodii iyo ilihii nololeed ee ay ku tiirsanaayeen.”
