Muqdisho (Dawan)– Guddoomiyaha Hay'adda Maareynta Musiibooyinka Soomaaliyeed (SoDMA), Maxamuud Macallin Cabdulle, ayaa daah-furay mashruuc taakuleyn lacageed lagu gaarsiinayo 130 qoys oo ay ku jiraan carruur agoon ah oo danyar ah, si looga taageero daboolidda baahiyahooda nololeed ee aasaasiga ah.
Mashruucan waxaa fulinaysa Hay'adda IHH Humanitarian Relief Foundation ee Turkiga, iyadoo qayb ka ah dadaallada lagu taageerayo qoysaska nugul iyo carruurta waalidkood waayay ee ku nool Soomaaliya.
Sida ay sheegtay SoDMA, mashruucan wuxuu diiradda saaraya xoojinta nolosha qoysaska danyarta ah, iyadoo taageerada lacageed ay ka caawin doonto daboolidda baahiyaha muhiimka ah sida cuntada, caafimaadka iyo waxyaabaha kale ee aas-aasiga u ah nolosha.
Hay'adda IHH ayaa muddo dheer ka shaqeynaysay arrimaha bani'aadannimada iyo horumarinta bulshada Soomaaliyeed. Marka laga eego guud ahaan barnaamijyadeeda, IHH waxay bishii taageertaa in ka badan 150,000 carruur agoon ah oo ku kala nool 44 dal iyo 81 magaalo oo Turkiga ah, iyadoo sannad kasta gargaar joogto ah gaarsiisa in ka badan hal milyan oo agoon dhinacyada waxbarashada, caafimaadka, cunnada iyo hoyga.
