Soomaaliya, 27 Oktoobar 2025 — Dowladda Soomaaliya ayaa qorsheyneysa inay dib u soo celiso Somali Airlines, iyadoo sidoo kale la sameynayo casriyeyn lagu sameynayo Garoonka Caalamiga ah ee Aden Adde, sida uu sheegay Wasiirka Gaadiidka iyo Duulista Rayidka, Maxamed Faarax Nuh, intii lagu guda jiray munaasabadda wareejinta maamulka cusub ee garoonka.
Wasiirka, oo ka hadlayay munaasabadda xilka u kala wareejinta maamulka garoonka ee Muqdisho Axaddii, ayaa sheegay in dib-u-soo-noqoshada Somali Airlines ay ujeeddadeedu tahay in dalka uu yeesho diyaaradeed ammaan ah oo la isku halleyn karo, kuna shaqeysa si waafaqsan heerarka caalamiga ah.
“Waxa soo socda oo aad ku farxi doontaan, annaga iyo shacabka Soomaaliyeed, diyaaraddii Somali Airlines oo aanu jeclayn, sanadkan intuusan dhammaan ayay timaadi doontaa,” ayuu yiri Nuux, isagoo adkeeyay muhiimadda casriyeynta garoonka, tababarka shaqaalaha, iyo u hogaansanaanta xeerarka iyo shuruucda.
Wuxuu dhaliilay faragelinta siyaasadeed ee hore iyo u hagaasnaan la’aanta sharci ee garoonka ka jirtay, isagoo ku baaqay in la raaco maamulka saxda ah iyo xeerarka.
“Waxa na hortaagan ma aha aqoon la’aan ama qalab la’aan. Waa u hoggaan sanaan la’aanta shaqaalaha hay’adda dowladda iyo kuwa ammaanka oo kow ka ah, halka siyaasiyiintu mararka qaar fowdo ka sameeyaan garoonka,” ayuu Nuux intaa ku daray.
Wasiirku wuxuu sidoo kale iftiimiyay qorshayaasha dowladda ee keenista diyaarado cusub, casriyeynta xarumaha garoonka, iyo hagaajinta howlaha guud, isagoo adkeeyay in dhammaan shaqooyinku ay raaci doonaan sharciga iyo xeerarka saxda ah.
Ku dhawaaqista ayaa imanaysa kadib markii dowladda ay horay u sheegtay inay iibsatay labo diyaaradood oo Airbus A320 ah, taasoo calaamad u ah howlgalka diyaaradeed ee qaranka markii ugu horeysay tan iyo burburkii dowladda dhexe ee Soomaaliya 1991. Iibsashada diyaaradaha oo la shaaciyey bishii July 2025, ayaa xilligaas dowladda sheegtay in diyaaradaha la heli doono laba bilood gudahood.
