Somaliland oo wadatashi ugu yeertay wakiilkeedii Jabuuti

Wasaaraddu waxay xustay in tallaabadani ay ka mid tahay geeddi-socodka la-tashiyada diblomaasiyadeed ee joogtada ah, isla markaana aanay ka baxsanayn dhaqanka iyo xeerarka caalamiga ah ee diblomaasiyadda.

Tallaabadan ayaa imanaysa xilli uu aqoonsiga Israa'iil ee Somaliland uu dhaliyay dhaqdhaqaaq diblomaasiyadeed oo ka socda gobolka, iyada Jamhuuriyadda Jabuuti ay ka mid noqotay dowladihii ugu horreeyay ee si rasmi ah u cambaareeyay go’aanka Israa’iil ay ku sheegtay aqoonsiga Somaliland, isla markaana si cad u muujisay taageerada ay u hayso madax-bannaanida, midnimada iyo wadajirka dhuleed ee Jamhuuriyadda Federaalka Soomaaliya.

Illaa iyo hadda, Somaliland faahfaahin dheeraad ah kama bixin ujeeddooyinka gaarka ah ee wadatashiga wakiilka dib loogu yeeray, balse tallaabada ayaa loo arkaa mid muujinaysa dareen diblomaasiyadeed oo la xiriira xaaladda siyaasadeed ee hadda ka taagan gobolka.