Muqdisho (Dawan)— SomBank ayaa barnaamijkeeda T-Plus ku dartay adeeg lagu goosto tigidhada diyaaradaha. Adeegga ayaa macaamiisha u oggolaanaya inay raadiyaan duulimaadyo, isbarbar dhigaan qiimayaasha, isla markaana tigidka ku iibsadaan barnaamijka, sida lagu sheegay war-saxaafadeed uu bangigu soo saaray Isniintii.
Adeegga oo lagu magacaabo T-Plus Travel ayaa macaamiisha u saamaxaya inay doortaan tigid tegid keliya ah, tigid tagid iyo soo noqosho ah ama safar magaalooyin badan maraya. Waxay sidoo kale geli karaan xogta rakaabka, dooran karaan qaybta ay diyaaradda ka raacayaan, kuna bixin karaan lacagta tigidka T-Plus.
SomBank wuxuu sheegay in dadka adeegga ku iibsada tigidyada ay heli karaan qiimo-dhimis, balse qiimaha iyo qiimo-dhimistu ay ku xiran yihiin duulimaadka la doortay. Bangigu ma sheegin inta ay le’eg tahay qiimo-dhimistu ama shirkadaha diyaaradaha ee adeegga laga heli karo.
