Soomaalida Sweden oo shan kursi ka helay Baarlamaanka dalkaas

Sweden (Dawan) – Shan siyaasi oo Swedish ah asal ahaana kasoo jeeda Soomaaliya ayaa ku guuleystay kuraasta Baarlamaanka Sweden ee “Riksdag”, kaddib doorashadii guud ee dalka ka dhacday 13-kii Sebtembar, sida ku cad liiska rasmiga ah ee xildhibaannada la doortay ee uu soo saaray Baarlamaanka Sweden.

Shanta xildhibaan ayaa kala matalaya Xisbiga Cagaaran iyo Xisbiga Bidixda, waxaana laga soo doortay afar deegaan doorasho oo kala ah degmada Göteborg, degmada Stockholm, gobolka Södermanland iyo gobolka Dalarna.

Leyla Cali Cilmi oo Xisbiga Cagaaran ka soo baxday Göteborg ayaa ah xildhibaanka keliya ee shanta ka mid ah ee horey uga tirsanaa Baarlamaanka Sweden. Waxay markii ugu horreysay Riksdag kasoo gashay 2018, waxaana dib loo doortay 2022 iyo 2026, iyadoo noqotay haweeneydii ugu horreysay ee asal ahaan Soomaali ah ee xubin ka noqota Baarlamaanka Sweden.

Ilyaas Xasan ayaa Xisbiga Bidixda uga soo baxay degmada Stockholm, isagoo markii ugu horreysay xubin ka noqonaya Baarlamaanka Sweden muddada afarta sano ah ee 2026 ilaa 2030.

Maxamed Cabdigani ayaa Xisbiga Cagaaran uga soo baxay gobolka Södermanland, kaddib markii uu helay 484 cod oo shaqsi ah. Waxa uu ka mid noqday siddeed musharrax oo dalka oo dhan ka tirsan kuwaas ku guuleystay inay ka gudbaan booskii markii hore looga daray liiska xisbiyadooda, taas oo ay ugu wacan tahay codadka shaqsiga ah ee ay heleen.

Gobolka Dalarna waxaa laga doortay laba xildhibaan oo asal ahaan Soomaali ah. Mursal Ciise ayaa Xisbiga Cagaaran uga soo baxay gobolka, halka Maxamed Cabdulqaadir Cali, oo liiska Baarlamaanka Sweden ugu qoran magaca Mohamed Ali, uu Xisbiga Bidixda uga soo baxay isla gobolka.

Cali oo 30 jir ah, kana soo jeeda magaalada Borlänge, ayaa helay 648 cod oo shaqsi ah, taas oo u saamaxday inuu booska sagaalaad ee liiska gobolka ee xisbiga uga soo gudbo booska koowaad, sidaasna uu ku helo kursiga Baarlamaanka.

Doorashada shantan xildhibaan ayaa timid kaddib markii mucaaradka xisbiyada dhexe ee bidixda u janjeera ay ku guuleysteen 176 ka mid ah 349-ka kursi ee Baarlamaanka Sweden, halka isbahaysiga garabka midig ee talada ka baxay uu helay 173 kursi.