Soomaaliya iyo Algeria oo Iska Kaashanaya Xoojinta Xiriirka Ganacsi

Algeria (Dawan) — Soomaaliya iyo Algeria ayaa ka wada hadlay xoojinta xiriirka ganacsi iyo iskaashiga dhaqaale ee labada dal, iyadoo diiradda la saaray ballaarinta fursadaha ganacsi iyo qorshe lagu dhisayo gole ganacsi oo isku xira ganacsatada labada waddan, sida uu baahiyey Telefishinka Qaranka Soomaaliya (SNTV).

Safiirka Jamhuuriyadda Federaalka Soomaaliya u fadhiya Algeria, Yuusuf Axmed Xasan, ayaa kulan la yeeshay Wasiirka Ganacsiga Dibadda iyo Dhiirrigelinta Dhoofinta Algeria, Prof. Kamaal Ruzeeq, iyagoo ka wada hadlay sidii loo horumarin lahaa xiriirka dhaqaale ee Soomaaliya iyo Algeria.

Kulanka ayaa si gaar ah diiradda loogu saaray kordhinta suuq-geynta badeecadaha Algeria ee Soomaaliya, sahminta fursadaha dhoofinta iyo sidii badeecadaha dalkaas ay qayb uga noqon lahaayeen daboolidda baahida suuqa Soomaaliya.

Labada dhinac ayaa sidoo kale ka wada hadlay qorshe lagu dhisayo Golaha Ganacsiga Soomaaliya iyo Algeria, kaas oo loogu talagalay inuu xoojiyo xiriirka ganacsatada labada dal, dhiirrigeliyo hindisayaasha ganacsi ee wadajirka ah, isla markaana fududeeyo iskaashiga dhaqaale.

Golaha la qorsheynayo ayaa la doonayaa inuu noqdo madal ay ganacsatada Soomaaliya iyo Algeria ku xoojiyaan xiriirkooda, kuna sahmiyaan fursadaha ganacsi ee ka dhex jira labada suuq.

Wadahadalladan ayaa qayb ka ah dadaallada ay labada dal ku doonayaan inay ku ballaariyaan xiriirkooda ganacsi, iyagoo mudnaanta siinaya isu-socodka badeecadaha iyo horumarinta iskaashiga u dhexeeya ganacsatadooda.